Rumların Akhisar’daki Protestanlara Baskı Yaptıkları
RUMLARIN AKHİSAR’DAKİ PROTESTANLARA BASKI YAPTIKLARI
[Saruhan'ın Akhisar kazasında bulunan Protestanlara, Rumlar tarafından baskı yapıldığı ve mallarının gasbedilerek kendilerinin ölümle tehdit edildiği Protestan vekili tarafından bildirildiğinden bu konuda gerekli tedbirlerin alınması.]
28 Ş. 1269 (6 Haziran 1853)
Ma’rûz-ı çâkerleridir ki,
Saruhan sancağına tâbi’ Akhisar kazâsında bulunan Protestan tâ’ifesine hasebü’l-mezheb Rumlar tarafında icrâ-yı garaz ve nefsâniyet içün rencîde ve ta’addî ve kendilerinin telef ve i’dâmına kasd ve tesaddî olunduğundan başka emlâkları dahi gâret olunarak tâ’ife-i merkûmenin râhat ve emniyetleri külliyen münselib olduğundan ta’addiyât-ı vâkı’anın men’ ve def’i husûsu Protestan vekili tarafından bâ-takrîr ifâde ve inhâ olunmuş olup nezd-i âsafânelerinde müstağnî-i ta’rîf ve beyân olduğu üzere her sınıf tebe’a-i Devlet-i Aliyye’nin istikmâl-i esbâb-ârâmiş ve istirâhât-bâlları matlûb ve mültezim olan usûl tebe’a-i perverî ve ma’delet iktizâsından olduğundan Rumlar tarafından bunlar hakkında îkâ’ olunan cevr ü ezâ ve tesaddînin men’ ve def’i ve tahkiye olunan gâret-i emlâk mâddesinin dahi bi’t-tahkîk sahîh olduğu hâlde istirdâd ve ihkâk-ı hakk etdirilmesi husûsuna himem-i behiyye-i âsafâneleri der-kâr buyurulmak bâbından emr ve irâde hazret-i men-lehü’l-emrindir.
Fî 28 Ş. sene [12]69 Mustafa Nailî
BOA. A. MKT. UM. 140/21