Tırhala’da Hıristiyan Ahali Ve Askerler Tarafından Müslümanlara Baskı Yapıldığı Ve Yeni Tamir Edilen Caminin Tahrip Edildiği
Yunanistan’da Bulunan Müslümanların Can Ve Mallarının Tehlikede Olduğu
Yenişehir Ve Girit’te Müslümanların Can Ve Mallarının Tehlikede Olduğu
Girit’te Müslümanların Can Ve Mallarının Tehlikede Olduğu Ve Binden Fazla Müslümanın Katledildiği
Yenişehir’de Müslümanların Çeşitli Bahanelerle Tutuklandıkları Ve Göçe Zorlandıkları
Yenişehir Ve Kardice’de Müslümanların Baskı Altında Tutularak Göç Ettirilmeye Çalışıldığı
Girit’te Hıristiyanlar Tarafından Müslümanlara Mezâlim Yapıldığı Ve Girit’in İşgalinden Önce Müslümanlara Güvence Veren Devletlerin Buna Seyirci Kaldıkları
Kandiye’de Hünkâr Camisi’nin Bahçesine Merkezî Hükûmet Tarafından Kanun Ve Hukuka Aykırı Olarak Müze İnşaatı Yapılmakta Olduğu
Hasat Mevsiminde Yunanistan’a Giden Amelelerin Dönüşte Yunan Askerleri Tarafından Tahkir Edildiği Ve Bir Kısmının Yaralandığı
Parga’ya Gitmekte Olan Kaptan Şaban’a Ait Kayığın Yunan Askerlerince Çevrildiği Ve Yolcuların Eşyalarının Gaspedildiği
Kıbrıs’ta Rumların Komiteler Kurarak Müslümanlara Karşı Saldırılarda Bulundukları Ve Yunan Emellerini Gerçekleştirmek İstedikleri
Yunanlılar’ın Müslümanları Göç Ettirmeye Yönelik Zulüm Ve Yıldırma Hareketleri
Selanik İle Civar Kazalarda Rum Muhacirlerin Müslümanların Mal Ve Emlaklarına El Koydukları Ve Yunan Askerlerinin Kadınlara Tecâvüz Ettikleri
Drama’nın Karagöz Köyünde Müslüman Halkın Yunan Askerlerince Dövüldüğü
Yunan Askerlerinin Drama’da Bazı Köylere Girerek Halka Zulüm Ve Kadınlara Tecâvüz Ettikleri
Yunanistan’ın Türk Yerleşim Birimlerine Rumları İskân Ettirdikleri Ve Camileri Tahrip Ederek Türkleri Hıristiyanlığı Kabule Zorladıkları
Yunanlıların Makedonya Ve Batı Trakya’da Müslüman Halka Zulmettikleri
Drama Ve Havalisindeki Müslüman Ahaliye Zulmedilip Kadınlara Tecâvüz Edildiği
Sisam’da Yunan Askerleriyle Komitecilerin Osmanlı Sahillerine Saldırma Hazırlıkları Yaptığı
Selanik Civarındaki Müslüman Köylerde Halkın Göçe Zorlandığı Ve Müslümanların Evlerine Zorla, Kafkasya’dan Gelen Rum Göçmenlerin Yerleştirildiği
Kavala Civarında Önce Bulgarlar, Daha Sonra Da Rumlar Tarafından Bazı Cami, Mescid Ve Mezarlıkların Tahrib Edildiği
Yunan Hükûmeti’nin Hıristiyan Halkı Silahlandırıp Müslüman Halkın İdaresinde Olması Gereken Mektep, Medrese Ve Vakıfhaneleri Zorla İşgal Ettiği
Vodine’de Müslümanların Mukaddes Yerleriyle Can, Mal Ve Irzlarına Taarruz Edilmesine Yunan Hükûmeti’nin Kayıtsız Kaldığı
Vodine Ve Selanik’te Bazı Camilerin Rumlar Tarafından İşgal Ve Tahrip Edildiği
Hanya’da Yunanlılar Tarafından Cami Ve Mekteplere Saldırılar Yapıldığı
Hanya’daki Sultan İbrahim Camisi’nin Kiliseye Çevrildiği
Zihne’deki Müslümanların Drama’ya Nakl Ve Tehcir Edilerek Mal Ve Eşyalarının Yağmalandığı
Batı Trakya’daki Müslümanlara Yunanlılar Tarafından Yapılan Zulüm Ve Baskının Gün Geçtikçe Artmakta Olduğu
Yunanlılar’ın Trakya’yı İşgal İçin Yaptıkları Mezâlim Ve Propaganda Faaliyetleri
Yunanlıların Gümülcine Civarında Yaptıkları Askerî Faaliyetler Ve Baskılar
Yunanlıların Ermenileri Zorla Askere Aldıkları, Doğu Ve Batı Trakya’yı İşgale Hazırlandıkları Ve Çorlu’da Katliâm Yaptıkları
Yunanlıların Trakya’daki Müslümanlara Göç Etmeleri İçin Baskı Ve Zulüm Yaptıkları
Yunanlılar’ın Trakya’daki Halka Zorla Miting Yaptırdıkları Ve Hazırladıkları Belgeleri İmzalattıkları
Yunanlıların Trakya’da Camileri Basarak Tahrip Ettikleri, Halka İşkence Yaptıkları Ve Sebepsiz Yere Müslümanları Tutukladıkları
Batı Trakya’da Müslümanların Çeşitli Suçlar İsnadıyla Cezalandırıldıkları
Yunan Hükûmeti Tarafından Yunanistan’daki Türklere Karşı Rum Çetelerinin Silahlandırıldığı
Batı Trakya’daki Rum Ve Ermeni Çetelerin Müslüman Halkı Göçe Zorladıkları

28 şubat 1924
Türkiye Cumhûriyeti
Mübâdele, İ’mâr ve İskân Vekâleti
Mübâdele ve İskân Müdîriyyet-i Umûmiyyesi
Sevkiyât Şu’besi
Umûmî: 9950
Husûsî: 542

Başvekâlet-i Celîleye

20/2/[13]40′da Drama’nın Şibce karyeli İsmail oğlu Mustafa Kahya Dedeağaç’dan yarım sa’at mesâfede Yunanlıların vâki’ ta’arruzunu müteyakkı­zâne hareketi ile def’ ederek derhâl Dedeağaç Hükûmeti’ne ihbâr eylediği hâlde ertesi gece Rahovine karyesinde Mü’min Kahya’nın sürüsüne aynı sûretle ta’arruz edilerek Mü’min Kahya’nın şehîd ve mahdûmu ile çobanlardan Mustafa’nın ağır sûretde cerhedildiği ve muta’arrızların Yunan Hükûmeti tara­fından teslîh edilen çetelerden olup yetmiş kadar koyun gasbeyledikleri İnöz Kaymakamlığı’nın iş’ârına atfen Trakya Mıntıka Müdîriyet’inden bildirilmek­dedir.

Hayvânât sâhiblerinin kuvve-i mâneviyyeleri üzerine te’sîr icrâ ederek mâ­lik bulundukları hayvânları mahallinde bırakdırmak emeliyle Yunan Hükûmeti tarafından yapdırıldığı muhtemel olan işbu mü’essif vekâyi’in adem-i tekerrürü esbâbının istikmâliyle Kavala’dan i’zâm olunan me’mûrumuzun teşebbüsü üze­rine mağsûb koyunlar istirdâd edilmiş ise de der-dest edilmeyen fâ’illerinin zâ­hire ihrâc ve tecziyesi husûsunda teşebbüsât-ı siyâsiyyede bulunularak netîcenin iş’ârı lüzûmunun Hâriciye Vekâlet-i Celîlesi’ne arzolunduğu ma’rûzdur. Efendim.

27-28/2/[13]40 Mübâdele, İ’mâr ve İskân

Vekâleti Vekili nâmına

İmzâ

BCA. 030. 10. 253. 706. 23

10 Eylül 1923

Türkiye Büyük Millet Meclisi Riyâseti
Baş Kitâbeti Ankara
Kavânîn Müdîriyeti 10/9/[1]339

Riyâset-i Celîleye

Garbî Trakya’dan alınan haberler pek fecî’ ve elîmdir. Yunanın devâm etmekde olan Mezâlimi dolayısıyla Garbî Trakya’daki kardaşlarımızın âkıbetleri pek vâhimdir. İskeçe’de Yunan Fevka’l-âde Dîvân-ı Harbince 29/Ağustos/[1]923 Çehârşenbe günü Trakya ihtilâlini tesrî’ töhmetiyle:

İskeçeli Bekir Sıdkı, Abdî efendiler, Menlikli Raif Bey, Doktor Nazif, Âsım, Reşid beyler, eşrâfdan Hilmi Hoca, Pomak Şükrü Efendi, Pomak Reşid, Basmacı Habil, Mu’allim İbrahim, eşrâfdan Hacı Eşref, Keresteci Hacı Osman, Müftî-zâde Şemsüddîn, Abdurrahim Osman efendilerden mürekkeb on beş zât i’dam.

Şerif Emin Ağa, Elbiseci Hüseyin Hüsnü, Âgâh Bey, Tahir Efendi, Dramalı Mehmed Bey, Ayaz-zâdelerden Rahim Ziya Bey, Abdurrahim-zâde Rıza, Hâfız Ali Galib efendiler, Tayyar Bey, Hacı Yusuf-zâde Abdulhalim Efendi, Kartal-zâde Hüseyin Hüsnü, Hâfız Mehmed, Ali, Tesbîhî-zâde Mehmed efendiler, Arif Efendi-zâde Raif Efendi, Hacı İbrahim Efendi, Arab Hüseyin Efendi, İmâm Hüseyin Efendi, Mehmed Fehmi Bey, Ferhad Erdiris Efendi, Sirozlu Hacı Mehmed Efendi, İbrahim Efendi, Servili Hilmi Efendi, Mehmed, İsmail efendiler, Hasan Bey, Ferruh Efendi, Receb efendilerden mürekkeb yirmi sekiz zât da on bir sene kürek cezâsına mahkûm oluyor. Bu zevât şehirlerden götürülen, mahkemeden geçmek sûretiyle gûyâ cezâ-dîde olanlardır. Köylerde yağma ve imhâ son derecede hüküm-fermâ oluyor. Hıdemât-ı vataniyyesine medyûn-ı şükrân olduğumuz Hâriciye Vekâlet-i Celîlesi’nin Garbî Trakya hakkında halâskâr vaz’iyet ve hareketde bulunmasını göz yaşlarımla istirhâm eylerim. Efendim.

Menteşe Meb’ûsu

Esad

BCA. 030. 10. 6. 31. 28

[Yunan askerlerinin Edirne'deki Katırcılar Camisi ile Malkara'nın Araplar köyü camisini basarak cemaate işkence yapıp camileri tahrip ettikleri; yakaladıkları kişilerden fidye istedikleri, Lalapaşa'da işkence yaptıkları on iki kişiden üçünün öldüğü; Göğüler köyünden Hüseyin'in ise cinnet getirdiği; Havsa'nın Burunsuz köyünün Yunan eşkıyâsı tarafından basıldığı; Müslümanların Yunan askerleri tarafından tutuklandığı, tutuklulardan bir kısmının açlıkdan öldüğü, kalanların ise Epir Adası'na sevkedildikleri ve on sekiz yaşından elli beş yaşına kadar herkesin yol yapımında çalışmaya mecbur edildiği hakkında Dahiliye Nezareti Emniyet-i Umumiye Müdüriyeti'nin tahriratı.]

14 Haziran 1922
Bâb-ı Âlî
Dâhiliye Nezâreti
Emniyyet-i Umûmiyye Müdîriyeti

Sinekli Hudûd Emniyet Müfettişliği’nden mevrûd 14 Haziran [1]338
târihli ve 107 numaralı tahrîrâtın sûretidir.

1- Ramazân-ı Şerîf’in yirmi sekizinci gecesi Edirne’de Yediyolağzı’nda vâki’ Katırcılar Câmi’-i Şerifi’ne bir Yunan zâbiti ma’iyeti sekiz neferle girerek kasaturalarıyla kandilleri kırdıkdan sonra namâz kılmakda olan cemâ’ati dışarı çıkararak işkence yapdıkları bi’l-âhire mezkûr cemâ’ât-i İslâmiyye re’îsi bulunan Ahmed Bey ile ilmiyeden müftî efendiyi hükûmete göndererek şikâyetde bulunmuşlar ise de hiç bir semere hâsıl olmadığı.

2- Ma’lkara kazâsına tâbi’ Arablar karyesi câmi’-i şerîfi Ramazân’ın yedinci gecesi Yunan eşkıyâları tarafından basılarak cemâ’atden iki kişinin kulağı kat’ edildikden sonra fidye-i necât olarak beş bin drahmi ve iki yüz elli lira-yı Osmânî almakla berâber cemâ’ati döğerek savuşup gitdikleri.

3- Lalapaşa kazâsına tâbi’ Savafeci karyesinden on iki kişiyi alarak köyün hâricinde bir mahalle kadar getirdikden sonra tel örgüsüne mahsûs dikenli tel ile çıplak oldukları hâlde Yunan jandarmaları tarafından darbedildikleri ve şiddet-i darbdan üç kişinin vefât etdiği.

4- Göğüler karyesinden Ahmed oğlu Hüseyin’in hiç bir esbâba müstenid olmadığı hâlde Yunan jandarmaları tarafından darbedilmekde iken tecennün eylediği Fransız konsolatosuna vukû’ bulan mürâca’at üzerine Hüseyin’in bîmârhâneye sevk ve etibbâ tarafından konsolosa şiddet-i darbdan müte’essiren cinnet getirdiğine dâ’ir rapor verildiği.

5- 7 Haziran [13]38 târihinde Havsa kazâsına tâbi’ Burunsuz karyesi, eşkıyâ tarafından basılarak birkaç sa’at süren bir müsâdemeyi müte’âkib Yunan müfrezelerinin yetişmesi üzerine şakîlerin firâra muvaffak oldukları ve bu esnâda halkdan birkaç kişinin vefât etdiği Burunsuz hâdisesinde alâkası olduğu bahâne edilen Edirne eşrâfından Kasım Efendi’nin mahdûmu Cevad Bey’in hükûmetce bir semt-i mechûle sevkedildiği, hayât ve memâtından henüz â’ilesinin ma’lûmâtdâr olamadığı, bu vak’ayı müte’âkib Yunan asker ve jandarmalarından mürekkeb bir kâfilenin lâ-ale’t-ta’yîn günlerde karye-i mezkûreyi basmakda bulundukları hiç bir delâ’il ve emâreye dest-res olunmadan der-dest etdikleri Müslimânların habshânelere sevkedilerek her dürlü ihtiyâcât-ı hayâtiyyeden mahrûm bırakıldıkları, bunlardan bir kısmının açlıkdan vefât, kısm-ı diğerinin Epir Adası’na sevkedilerek muhtelif cezâlarla tecziye edildikleri, şimdiye kadar bu vechile isnâdâtla mahkûm ve Epir Adası’na sevketdikleri Müslimânın 470 kişiye bâliğ olduğu.

6- On sekiz yaşından elli beş yaşına kadar olan her ferdin yollar inşâsına mecbûr tutulduğu, yapmayanların on beş drahmi vereceğinin beyânnâme sûretiyle i’lân edildiği ma’rûzdur. Ol bâbda.

Aslına mutâbıkdır.

Mühür

BOA. DH. KMS. 62/27

15 Kasım 1921
Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 598
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

İ’tilâf hükûmâtının Trakya’yı Türklere terkeylediklerine dâ’ir Avrupa’dan Atina’ya vürûd eyleyen bir haber üzerine evvelki gün Tekfûrdağı’nda bütün ahâlinin cebren iştirâkiyle bir miting akdedilmiş ve Yunan Hükûmeti’nin gâyet âdilâne icrâ-yı hükûmet eylediğine ve bu idâreden memnûn olduklarına dâ’ir Müslimânlardan resmen vesîka taleb ve ahzedilen vesîkalar i’tilâf hükûmâtı mümessillerine arzedilmiş, pasaport almak üzere mürâca’atda bulunanlardan da bu me’âlde ilm ü haberler alındığı ve ba’demâ Müslimânlara pasaport verilmeyeceği haber alınmağla ma’rûzdur. Ol bâbda emr ü fermân hazret-i men-lehü’l-emrindir.

Fî 15 Teşrîn-i Sânî sene [1]337 Sinekli’de Hudûd Emniyet Müfettişi

nâmına

Abdülhamid

BOA. DH. KMS. 60-3/22

7 Eylül 1921
Harbiye Nezâreti
Numara: 3
Hatt-ı Fâsıl Komiserliği’nin 22/8/[13]37 târihli ve 699 numaralı

raporun sûreti

1- Kadıköy şarkındaki Bozoğlaktepe vak’asından gayrı hatt-ı fâsıl üzerinde hiç bir şey olmamışdır.

2- Yunanîler Edirne’ye tâbi’ Görmut karyesinden Hacı Ağa’nın hânesine silâh taharrîsi maksâdıyla girüp sâhib-i hâne tarafından kendilerine matlûb paranın verilmemesinden nâşî merkûmun familyası Penbe Hanım’ın cerhedilmek sûretiyle vefâtına sebebiyet verildiği kezâ Buçuktepe Mahallesi’nden Mustafa’nın altı çocuğuyla berâber itlâf edildiği, Edirne’de alıkonulan Dârü’l-Eytâm talebesinden yirmi kadarının Rum ve Ermeni olduklarından bahsile Atina’ya gönderildiği ve buna müdâhale eden Meb’ûs Şevket Bey ile Çolak Sabrı’nin Atina’ya nakli refîkinin azledileceği ve ale’l-umûm çete â’ilesi diye ihbâr edilenlerin birer birer mahkûm edildikleri Babaeski kazâsına tâbi’ Nacak karyesinden Sadık Hoca, Taşağıl karyesinden Kara Ahmed, Avukat Salih Efendi, mahdûmu Bâhir, Reji Me’mûru Salim Efendilerin nefy ve bunlardan Kara Ahmed’in yolda parça parça edildiği Doğanca, Nadirli, Kara Mes’udlu, Yenimahalle ve Kuzuçardağı karyeleri ahâli-i Müslimesinin çıkarılup yerlerine Kafkasya taraflarından getirilen Rum muhâcirlerinin iskân etdirildiği ve Çerkesköy mıntıkasındaki köylerin cemâ’at-i İslâmiyye a’zâlarıyla ileri gelenlerinin darb ve Çorlu eşrâfından Ali Bey’in üç gün habsden sonra Edirne’ye sevkedildikleri (Tekrar Çorlu’ya i’âde edilen Ali Bey’in 15/8/[13]37′de pavyonlardan firâr eden Ermeni milletinden bir Yunan askeri tarafından bizzât görüldüğü) ve 35 yaşına kadar olan Ermenilerin taht-ı silâha da’vet edilüp, Türk ve Yahûdîlerden henüz asker alınmadığı ve Şarkî Trakya’da bu sene mahsûlâtın kat’iyyen olmadığı ve Urlı ile Edirne arasında ve fakat Ahur köyüne yakın bir mahalde ufak bir köprünün dinamitle çeteler tarafından atıldığı ve bunun üzerine tekmîl hat boyunda bulunan köylerin tel örgü ile muhâfaza edilmesine çalışıldığı ve takrîben on beş gün mukaddem Sofya’da Bulgarlar tarafından yedi Fransız zâbitinin mâhiyeti mechûl esbâbdan dolayı katledildikleri ve memleketlerine gitmek üzere mensûb oldukları kruvazör ve kıt’alardan firâr eden Çok, Kindi, Ren ve Arperen nâm İngiliz neferlerinin Sinekli İstasyonu’nda Fransız kontrol me’mûrları tarafından der-dest edilmiş oldukları Hudûd Emniyet Müfettişliği’nden mevrûd raporlardan anlaşılmışdır.

3- Mültecî ve Yunan askerî firârîsi olarak hatt-ı fâsılı bu tarafa geçen eşhâsın ba’de’l-isticvâb hükûmet-i mahalliyyeye teslîm edildiği ve bunların esâmîsini hâvî pusulanın leffen takdîm kılındığı ma’rûzdur.

Aslına mutâbıkdır.

28 Ağustos sene [1]337 Hatt-ı Fâsıl Komiseri

Kaymakam

Mehmed Cemil

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Husûsî: 529
Emniyyet-i Umûmiyye Müdîri Cânib-i Âlîsine

Atûfetlü efendim hazretleri,

Yunan zimâmdârının kanâ’ati Trakyalı Türklerin Bulgar çeteleriyle teşrîk-i mesâ’î etdiği merkezinde olduğundan tevkîfâta daha ziyâde germiyyet verdikleri, Edirne habshâneleri ma’sûm Türk ahâli ile imlâ edildiği gibi Kırkkilise mahbûshânesi’nde 2500 mevkûf olduğu ve bunlardan mücrimîn dışarıya çıkarılmamakda, diğerleri tahkîmât ve hidemât-ı sâ’ikasıyla istihdâm olunmakda ve akşâmları bütün mahbûsîn kalın kayışlarla bî-tâb bir hâle gelinceye kadar döğülmekde bulundukları ve fart-ı darbdan bir kısmının vefât etdiği, iffete ve ırza tecâvüz hâdiselerinin çoğalması İslam ahâliyi tahammül-sûz bir hâlde bırakdığından hicret arzûsunda bulunmuşlarsa da Yunan Hükûmeti’nce mümâna’atda bulunulduğu ve gerçi Yunan me’mûrîni mârrü’l-arz akîdeden dolayı bütün Trakyalı Türk ahâliyi tehcîr emelinde ise de tehcîrin Türkiye’ye mi, yoksa adalara mı yapılmasının daha muvâfık olduğu husûslarında ihtilâf-ı efkâr bulunduğu Türkiye’ye hicret fikrini besleyenler bu sûretle hareketin düşmân kuvvetini tezyîd demek olduğu kanâ’atinde oldukları, Bulgar hudûdunda ve Lalapaşa kazâsı civârında yirmi beş köyü hudûda yakın olduğu bahânesiyle kordon altında bulundurdukları mezkûr köylülerin hârice çıkmaları memnû’ olduğu gibi, diğer köylerden de bu köylülerle temâs imkânının selbedildiği Venizelist tarafdârlarının İslam ahâli arasında “Venizelos zamânında hiç bir İslam tevkîf edilmemişdir. Kostantin bak size ne fenâlıklar yapıyor. Komiteden diye ne işkencelere ma’rûz kalıyorsunuz. Kostantin Anadolu’da mağlûb olacak ve Venizelos yine gelecek siz de rahat edeceksiniz” diye propaganda yapdıkları Venizelist tarafdârı olup da azledilen me’mûrînin İstanbul’a geçmekde oldukları Yunanlıların Edirne ve Kırkkilise ve Muradlı, Çerkesköyü’nde tahkîmât vücûda getirmekde bulundukları ve Vize kazâsından Makedonya muhâcirlerinden Abdul Ağa ordan geçmekde iken Yunan jandarmaları tarafından öldürüldüğü ve merkûmun nezdinde bulundurduğu dâhilî vesîkasını merkebin semerinde bulduk, diye âmirlerine teslîm eyledikleri hâlde fi’l-i katlin ne sûretle ve kimin tarafından vukû’ bulduğu hakkında en ibtidâ’î tedâbîre bile tevessül edilmediği ve kezâ Vize kazâsından Tatarlı köyünden Çolak Mıstık’ın kendisine ve â’ilesine bıçakla işkence yapıldıkdan sonra 1600 lirasını aldıkları ve kazâ-yı mezkûrdan zîrde esâmîsi muharrer kesân tevkîf edilerek, bir kısmının Edirne’ye, diğerlerinin adalara sevkedildiği, Yunanîlerin Trakya’da ta’kîb etdikleri tedhîş-i siyâsî öyle bir şekil almışdır ki, hadd-ı fâsılı tecâvüz eden İslam ahâlinin hâlâ vekâyi’-i fecâyi’i söylemekden korkmakda ve endîşe etmekde bulundukları ve on günü akdem Anadolu cihetinden Tekfurdağı’na bir çok mecrûh çıkdığı ve mecrûhların kısm-ı küllîsi Dersa’âdet ve Trakyalı olup mu’ahharan bu mecrûhlar muhtelif kazâlara nakl ve sevkedildikleri şehr-i hâlin ikinci Cum’a günü sabahleyin Istranca karyesinden iki sa’at mesâfede ve hudûda balkandan ateş zuhûr ederek, itfâsına bütün Istranca karye ahâlisi gitmiş ise de söndürülememiş ve el-yevm devâm etmekde ve fâ’ili hakkında tahkîkât-ı lâzime icrâ kılınmakda olduğu berây-ı ma’lûmât arzolunur. Ol bâbda emr ü fermân hazret-i men-lehü’l-emrindir.

Fî 7 Eylül sene [1]337 Sinekli’de Hudûd Emniyet Müfettişi

Mehmed Nazmi

Tüccârdan Cafer Sadık Efendi,
Başmu’allim Zeynel Efendi,
İcrâcı Hicri Bey,
Tüccârdan Hasan Basri Efendi,
Muhtar Ahmed Efendi,
Sâbık Nüfûs Me’mûru Yakub Efendi,
Büyük Manika karyesinden Kara Bekir’in Hâfız İbrahim Efendi,
Büyük Manika karyesinden Tahsîldâr-ı sâbık Receb Efendi mahdûmu Osman,
Pazarcık Mahallesi’nden Abbas’ın familyası Hayriye Hanım,
Saray’ın Pazarcık Mahallesi’nden Petriç muhâcirlerinden Süleyman, (Merkûm ağzından vurularak öldürülmüşdür.)

BOA. DH. KMS. 60-3/16

[Yunanlılar tarafından Çorlu kazasında tutuklanıp, işkence edilerek öldürülenlerle ilgili listenin Yunan Mezâliminin canlı bir örneği olmak üzere takdim edildiği; Yunanlıların Rum çeteleriyle birlikte sınır boylarını işgal için hazırlıklar yaptığı; Doğu ve Batı Trakya'da bulunan Ermenileri önce gönüllü olarak sonra da zorla askere almak istemeleri üzerine Ermeniler tarafından İstanbul'daki ittifak devletleri temsilcilerine şikayette bulunulduğu, ayrıca Musevilerden de askerlik karşılığı altı ay için bin drahmi nakit alacaklarını ilan ettikleri, bütün bu hususların Yunanlıların yaptıkları zulüm ve işkencenin açık birer örneği olduğu hakkında Dahiliye Nezareti Kalem-i Mahsus Müdiriyeti'nin tezkiresi.]

9 Ağustos 1921
Bâb-ı Âlî
Dâhiliye Nezâreti
Emniyet-i Umûmiye Müdîriyeti
Umûmî: 370
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri

Çorlu kazâsında habsedilen ve işkence netîcesi vefât edenlerin esâmîsi Yunan i’tisâfâtının canlı bir şâhidi olduğundan ber-vech-i zîr arzolunur. Ol bâbda emr ü fermân hazret-i men-lehül emrindir.

Fî 1 Ağustos sene [1]337 Sinekli’de hudûd Emniyet Müfettişi

nâmına

Abdülhamid

Emir-zâde Halid Bey
Arnavud Ali Bey
Ressâm Niyâzî Bey
Temel Efendi-zâde Zeki
Bakkal Mehmed Ağa
Hacı Osman Kalfa (İşkence netîcesi vefât etmişdir.)
Bakkal Mehmed Ağa dâmâdı Hakkı Bey
Süleyman Çavuş
Ali Pehlivân-zâde Hüseyin
Kalleş Receb (İşkence netîcesi vefât etmişdir.)
Kalleş Receb birâderi Halil
İzzet oğlu Emin
Müslim Kahya
Arnavud Ali Kahya
Uzunhacılı Bakkal Kazım
Ferhadoğlu İbrahim
Emin Efendi, zâbitânlıkdan mütekâ’id
Hoca Hüseyin Efendi oğlu Faik Efendi
Reji Me’mûru Fevzî Efendi
Mehmed Bey’in Kâtibi Mustafa Efendi (Kırkkilise Habshânesi’nde Yunanlılar tarafından katledilmişdir.)
Kırkkilise’nin Kavakdereli Yusuf Ağa

Erkân-ı Harbiyye-i Umûmîyye Dâ’iresi

Şu’be: 3
Numara: 1213
Dâhiliye Nezâret-i Celîlesine

Ma’rûz-ı çâkerleridir,

Yunanlıların Şarkî ve Garbî Trakya’daki Ermenileri evvelâ gönüllü olarak orduya da’vet etdikleri hâlde şimdi cebren askere aldıklarından Ermenilerin Dersa’âdet’deki Düvel-i Müttefike mümessillerine mürâca’at etdikleri ve kezâ Mûsevîlerden altı ay içün bin drahmi bedel-i nakdî alacaklarını i’lân etdikleri Hudûd Komiserliği’nden istihbâr edilmekle berây-ı ma’lûmât arzolunur. Ol bâbda emr ü fermân hazret-i men-lehü’l-emrindir.

Fî 30 Zi’l-ka’de sene [1]339 ve Hâriciye Nâzırı

Fî 6 Ağustos sene [1]337 İmza

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 378

Emniyyet-i Umûmiyye Müdîriyeti Cânib-i Âlîsine

Yunanîler Edirne’ye tâbi’ Görmut karyesinden Hacı Ağa’nın hânesine silâh taharrîsi zımnında girdikleri hâlde maksad-ı mahsûsaları olan paranın verilmemesi yüzünden Hacı Ağa familyası Penbe Hanım’ın on sekiz yerinden yaralamak sûretiyle vefâtına sebebiyet ve kezâ Bıçaktepe Mahallesi’nden Mustafa’nın da aynı şenâ’atle altı çocuğuyla itlâf edildiği ve mukaddemâ yabancı olmalarından bir kısmı Dersa’âdet’e i’âde edilüp yerli olmalarından dolayı Yunanîler tarafından Edirne’de alıkonulan Dârü’l-Eytâm Mektebi talebesinden yirmi kadarının Rum ve Ermeni muhâcirlerinden olduklarından bahsile Atina’ya götürüldüğü, bu mes’eleye müdâhelelerinden Edirne belediye re’îsi iken meb’ûs olan Şevket Bey ile Cafer Tayyar Bey zamânında çete re’îsi olan Çolak Sabrı Atina’ya nefyedildikleri Müftî Hulusi Bey’in azledileceği, ale’l-umûm çete â’ilesi diye ihbâr edilenlerin birer birer mahkeme edildikleri, bunlardan Ahirköylü Ahmed Bey’in familyasının Edirne’de habs ve Kirişhâne’den Tütüncü Velî geliniyle üç çocuğunun nefyedildikleri gibi ihzâr edilmekde olan bir fırkanın İstanbul ve Çatalca’yı işgâl edeceği rivâyet olunduğu istihbâr kılınmakla ma’rûzdur. Ol bâbda emr ü fermân hazret-i men lehü’l-emrindir.

Fî 7 Ağustos sene [1]337 Sinekli’de Hudud Emniyet Müfettişi

İmza

Dâhiliye Nezâreti
Kalem-i Mahsûs Müdîriyeti
Târihi: 9 Ağustos sene [1]337

Huzûr-ı sâmî-i cenâb-ı Sadâret-penâhîye

Yunanîlerin Şarkî ve Garbî Trakya’da bulunan Ermenileri evvelce orduya gönüllü olarak da’vet etmiş oldukları hâlde bi’l-âhire cebren askere almalarından dolayı bunların Düvel-i Müttefika mümessillerine mürâca’atda bulundukları ve Mûsevîlerden altı ay içün bin drahmi bedel-i nakdî alacaklarını i’lân etdikleri Hudûd Komiserliği’nin istihbârına atfen Harbiye Nezâret-i Celîlesi’nden ve Yunan asâkirinin Rum çeteleriyle birlikde hatt-ı fâsılı bi’t-tecâvüz o havâlîyi işgâl edecekleri ve bu münâsebetle geçen Temmuzun otuz birinci gecesi Kalikratya karyesi Rum ahâlisinin izhâr-ı şâd-mânî ederek Yunan kıta’âtını istikbâl içün istihzârâtda bulundukları Hatt-ı Fâsıl Emniyet Komiserliği’nce icrâ kılınan tahkîkâtdan anlaşıldığı Çatalca Tabur Kumandanlığı’nın iş’ârına atfen Umûm Jandarma Kumandanlığı’ndan bildirilmiş ve Yunanîler tarafından Trakya’da îkâ’ olunan Mezâlime dâ’ir istihbârâtı hâvî olarak ma’lûmâtı Sinekli Hudûd Emniyet Müfettişliği’nin Emniyyet-i Umûmiyye Müdîriyeti’nden tevdî’ olunan 1, 2 ve 3 Ağustos sene [13]37 târihli ve 370, 371 ve 378 numaralı raporlarının sûretleri dahi manzûr-ı sâmî-i fahîmâneleri olmak üzere leffen takdîm kılınmış olmağla ol bâbda nezâret-i müşârün-ileyhâdan ahîren alınan bir tezkirede Yunanîlerin zulm ve i’tisâfâtı cümlesinden olmak üzere Çorlu’da habsedilüp işkence netîcesi olarak muharrerü’l-esâmî zevâtın vefât etmiş oldukları beyânıyla anlaşıldığı, bu husûsda teşebbüsât-ı siyâsiyye icrâsına lüzûm gösterilmiş olmasına ve bahsolunan zevâtın esâmîsi Sinekli Hudûd Emniyet Müfettişliği’nden de başkaca bildirilüp ol bâbdaki pusula dahi takdîm olunan raporlar miyânında bulunmasına nazaran îcâb-ı hâlin îfâsı menût-ı irâde-i celîle-i vekâlet-penâhîleridir. Ol bâbda.

BOA. DH. KMS. 60-3/2

12 Temmuz 1921
Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 338

Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

Yunanîlerin Gümülcine’deki bir fırka kuvvetinin Tekfurdağı’na nakle­dildiği ve Kırkkilise’de bir alaya yakın kuvvetleri olduğu ve Gümülcine’nin İncemahbân Nâhiyesi Müdîri Mustafa Efendi ile Şeyhan Nâhiyesi Müdîri Osman Ağa ve mezkûr nâhiye kâtibi Fethi Bey’in tevkîf ve darbedildiği ve bunlardan Fethi Bey’in işkence netîcesi vefât etdiği ve bütün bu i’tisâfât Fransızların gûyâ Trakya’yı terketdikleri vakit Türklere bırakdıkları esliha ve mühimmâtın zâhire ihrâcı vesîlesiyle vesâ’ir esbâb-ı vâhiye serdiyle yapılmakda olduğu haber alınmakla ma’rûzdur. Ol bâbda emr ü fermân hazret-i men-lehü’l-emrindir.

Fî 12 Temmuz sene [1]337 Sinekli’den Hudûd Emniyet Müfettişi

nâmına

Abdülhamid

BOA. DH. KMS. 60-2/49

11 Nisan 1921

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 233
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

Yunanlılar Makedonya’da İslam, Mûsevî ve Ermenilerden bedel-i nakdî kabûl etdiğini, Şark ve Garbî Trakya’da Müslimânların yirmi bir yaşından otuz bir yaşına kadar olanlarının belediyeden künyeleri istenildiği ve Rumlardan otuz beş yaşına kadar askere da’vet olunmuş ise de kuvve-i ma’neviyyeleri bozulmuş olduğundan icâbet etmediklerinden cebr ü tazyîkle alınmağa karâr verildiği ve Şarkî Trakya’da siyâseten habsedilen yedi bin kadar Müslimândan ekserîsi tahliye olunduğundan el-yevm Edirne’de iki-üç bin kişi kadar ancak kaldığı, bunların da Nisan-ı Rûmî’nin yirmi altıncı günü Yunan Hükûmeti’nin yüzüncü senesi olduğundan yevm-i mezkûre[de] afv-ı umûmî i’lân olunacağı ve mezkûr günü tes’îden Edirne’de tâklar yapılmakda olduğu ve bir hafta mukaddem Hayrabolu müftîsinin ayağından iple bağlayarak dereye kadar sürüklemek sûretiyle işkence etdiklerinden Tekfurdağı Meb’ûsu Mustafa Neyyir Bey bi’z-zât kazâ-yı mezkûra azîmetle müftî-i mûmâ-ileyhi alup Edirne vâlisine götürerek vak’ayı anlatdığından ba’demâ Müslimânlara ilişilmemesi içün emir verildiği ve Uzunköprü kazâsına tâbi’ Hamidiye karyesinden bir İslam kadına “Zevcinin silâhlarını söyle !” diyerek bacaklarından bir ağaca asarak donuna bir kedi konulup altına yakılan bir ateşin dumanıyla iz’âç olunmak sûretiyle işkence edildiği ve Çerkesköyü’nden habsolunanlardan Belediye Re’îsi Molla Mehmed ve tüccârdan Osman ve Saraylı Halid ve Kahveci Faik ve mukaddemâ Çerkesköy İstasyonu’nda inzibât askeri me’mûru olan Mustafa efendiler salıverilmişlerse de mûmâ-ileyh Mustafa Efendi’ye boğazına kaynar su dökülmek sûretiyle işkence edildiğinden vefât etdiği ve Çorlu eşrâfından Arnavud Ali ve Ziya beylerle Bakkal Mustafa ve Tüccâr Emin ve Reji Me’mûru Feyzi Bey ve Çengel Çiftlik sâhibi Ziya ve Mehmed beylerle müftîsi ve bunlardan daha kırk kişi habsedilmişlerse de ekserîsi bugünler tahliye olunduğu ve mektûblar umûmiyetle postahânede açılarak ba’dehû kapanmak sûretiyle sansür yapıldığı ve bugünler Ortaköy, Karabağ, Kemal, Doğanca hudûdunda Bulgarlarla sık sık müsâdeme edildiğinden her gün dört-beş mecrûh Edirne’ye getirilmekde olduğu istihbâr kılınmağla arzolunur. Ol bâbda emr ü fermân hazret-i men-lehü’l-emrindir.

Fî 7 Nisan sene [1]337 Sinekli’de Hudûd Emniyyet Müfettişi

Mehmed Nazmi

Çekmece’de Kalıkratya Merkez Me’mûriyeti’nin 78 numaralı ve fî 11 Nisan sene [1]337 târihli tahrîrâtı sûretidir.

40 numaralı ve fî 21 Mart sene [1]337 târihli tahrîrât-ı aliyyeleri üzerine vâki’ olan tahkîkât-ı âcizîde Kâtib Abidin Efendi’nin müsellâh iki Yunan askeri tarafından hânesinden gece yarısı kaldırılarak ve karye hâricine çıkılınca tâ Sürgün karyesine kadar döğülerek, söğülerek elleri bilekçe ve ba’dehû kolları iple bağlı olduğu hâlde götürüldüğü ve polis koğuşunda dahi döğülüp, söğüldüğü ve sabâhı gelen zâbitler tarafından sehven götürüldüğü beyânıyla ve orada li-maslahatin bulunan Yenice köyünün sâbık muhtarı refâkatiyle i’âde edildiği ve bu keyfiyetin işâ’a edilmemesi dahi zâbit tarafından tedhîşi mutazammın ve müfîd bir tarz u beyânda tefhîm kılındığı nâ-kâbil-i ketm ve efkâr bir derecede mütehakkık ve mütebeyyin bulunduğuna ve mezkûr karyenin sükkânı bi’l-umûm Hıristiyân milletinden ve millet-i mezkûre şu sıra Yunanîlerin desâ’is-i siyâsîlerini ne mertebe fırkası bulunduklarından ve vukû’ bulan musâhabede gerçi bu tecâvüzü[n] cümlesi tarafından bî-rahmâne ve mel’ûnâneyi takbîhen tasdîk ve tebyîn edilmekde ise de bunlardan birisine vukû’ bulacak su’âle cevâb-ı nigerânenin verileceği mütehakkık bulunmasıyla berâber taraflarından kâtibin şikâyeti üzerine tahkîk içün gelmiş diye Yunanîlerin dahi derhâl âgâh edileceklerine ve mezkûr karyeye yevm-i muvâsalatım olan Mart’ın yirmi üçüncü gününden avdetinin günü olan otuz birinci gününe kadar her gün müsellâh bir onbaşı ile iki, ba’zen üç nefer Yunan askerinin mezkûr karyeye sabâhları gelerek öğlen üzerleri avdet ve akşam üzeri dahi diğer bir onbaşı ile aynı mikdâr askerin gelüp gecelere kadar âdetâ mezkûr karyenin inzibâtına me’mûr imiş gibi bulunmakda olduklarını bi’z-zât müşâhede eylediğime mebnî bi’l-âhire başka bir Mezâlime bâdî olacağı mütâla’asıyla mezkûr tahkîkâtım tevsî’ ve ta’mîkinden insirâf-ı nazarla yalnız Kâtib Abidin Efendi’nin me’hûz ifâdesiyle iktifâ edilmiş ve mezkûr ifâde zîrine ayrıca fezleke ve mütâla’a dercine de lüzûm görülememişdir. Ma’a-mâfîh bu bâbdaki müşâhedât ve mesmû’âtıyla âcizânem Abidin Efendi’nin bu sûretle kaldırılmasının dahi yollarda hayâtına kasdolunacağı gibi harekât-ı hâ’inâne ile de kat kat giriftâr-ı ye’s ve tedehhüş edilmiş bulunmasının kable’l-muhârebe Ereğli’de bulunan me’mûrlardan zannedilmiş bulunduğundan nâşî olduğu ve hâricden mesmû’ olduğuna nazaran â’ilesinin yüz aded altun lira kıymetli hulliyâtının dahi askerler tarafından gasbolunduğu ve fakat Abidin Efendi’nin bi’l-âhire ma’rûz kalacağı daha azîm tehlikeye karşu bu bâbda şakşakada bulunamadığı ve efrâd-ı â’ilesi el-ân başka hânede birer mecnûne hâlinde bulunmakda ve Abidin Efendi dahi pek müte’essir ve mütedehhiş görünmekde bulunduğundan herhâlde diğer bir mahal kitâbetine hem de müsâra’aten kaldırılması ve çünki kaldırılmayacak olduğu sûretde efrâd-ı â’ilesinin a’sâb veyâhut kalb illetine mübtelâ olmaları hemân mutlak gibi görüldüğüne ve bununla berâber kuvve-i ma’neviyyesi tâ bu mertebeye muhtel olan Abidin Efendi’nin de îfâ-yı vazîfede bi’l-âhire matlûb derecede gayret ve besâleti görülememesi melhûz idüğine ve herhâlde diğer bir me’mûriyet kitâbetine nakli hem adâleten, hem maslahaten muvâfık olacağı muhât-ı ilm-i âlîleri oldukda îcâb-ı serî’asına bî-dirîğ-i himmet buyurulması ma’rûzdur.

Sinekli Merkez Rüsûmât Müdîriyeti

BOA. DH. KMS. 60-3/28

[Batı Trakya'da Yunanlıların birçok Müslüman ahaliyi komiteci diyerek tutukladıkları, silah arama bahanesiyle köyleri bastıkları, ahaliden bir çoğunu işkenceyle katledip yaraladıkları, ayrıca bütün Müslüman cemaatlere zorla mitingler yaptırarak, Yunan idaresinden hoşnut oldukları ve Batı Trakya'nın Türklere bırakılmasının istenmediğine dâir Londra Konferansı'na ve Atina'ya telgraf gönderttikleri; Müslümanların çok oldukları yerlerde baskılarını arttırarak göç etmelelerini sağlamaya çalıştıkları, bu nedenle Rumların, çoğunluğu ele geçirmeleri için yaptıkları faaliyetin önlenmesi yolunda konferans nezdinde teşebbüsde bulunmak üzere durumun Murahhas Heyeti Riyaseti'ne bildirilmesi gerektiği.]

1 Mart 1921
Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 173
Emniyyet-i Umûmiyye Müdiriyeti Cânib-i Âlîsine

Atûfetlü efendim hazretleri,

Edirne’de komiteci olduklarından bahsile Yunanîler iki günden beri Müslimân eşrâf ve mu’teberânını ve göze çarpan güçlü kuvvetlileri tevkîf etmekde olduğundan tevkîfhâneler istî’âb edemediğinden bir çoğunu da Saraçhane Köprüsü başındaki istihkâm kışlasıyla yanık kışlaya tevkîf etmekde oldukları mevsûkan istihbâr kılınmağla ma’rûzdur. Ol bâbda emr ü irâde hazret-i men-lehü’l-emrindir.

Fî 24 Şubat sene[1]337 Sinekli’de Emniyyet-i Hudûd Müfettişi

Mehmed Nazmi

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Emniyyet-i Umûmiyye Müdîriyyet-i Âlîsine

Atûfetlü efendim hazretleri,

Yunanîler İslamlarla Bulgarların komite teşekkül etdiklerine dâ’ir gûyâ Bulgaristan’da elde etdikleri vesâ’ikde esâmî cedveli olduğundan bahsile evvelce arzedildiği vechile tevkîfâtlarına devâm etmekde oldukları hattâ birkaç günden beri Edirne’de vesîkasız Müslimânları geceleyin hârice bırakmamakda ve Lülebergos, Kırkkilise, Vize, Saray ve Çerkesköy cihetlerinde onar-on beşer eşrâf ve ağniyâyı bir semt-i mechûle götürdüğü gibi Saray müftî-i sâbıkı yetmiş yaşlarında bulunan zâtla altı eşrâfını da bunlar miyânında gönderdiği ve buralarda da köylüleri vesîkasız diğer köye göndermemekde olduğu ve Çerkesköyü’nde Yunanîler tarafından fenâ hâlde darbedilenlerden beş-on kişi hânesinde ölüm derecelerinde hasta yatmakda oldukları ve Sırblar da Kosova’nın kazâ ve köylerinde Müslimânlara işkence yaparak katletmekde bulundukları istihbâr kılınmağla arzolunur. Efendim. Ol bâbda emr ü fermân hazret-i men-lehü’l-emrindir.

Fî 26 Şubat sene [1]337 Sinekli Hudûd Emniyet Müfettişi

Mehmed Nazmi

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 176
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

Yunanîlerin Şarkî Trakya’daki tevkîfât ve tazyîkâtı mukaddemâ arz u iş’âr olunduğu vechile tahammül-sûz ve cân-hırâş bir şekil aldığı ve tevkîf edilenlere dürlü dürlü işkenceler yapılarak bî-tâb bir hâle ifrâğ edilmekde oldukları ve son iki gün zarfında yalnız Çerkesköyü’nde yüz kadar tevkîfât yapılarak Edirne’ye sevkedildikleri haber alınmağla ma’rûzdur. Ol bâbda emr ü fermân hazret-i men-lehü’l-emrindir.

Fî 26 Şubat sene [1]337 Sinekli’de Hudûd Emniyet Müfettişi

nâmına

Abdülhamid

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 177
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

Yunanîlerin Şarkî Trakya’da yapmakda oldukları tazyîkâta â’id edinilen mütemmim ma’lûmâta nazaran Saray kazâsı müftî-i lâhıkı ile eşrâfından Hasan Basri ve Kömür Tüccârı Sadık efendilerin tevkîf ve darbedildikleri ve Çerkesköyü’nde eşrâf-ı mu’tebereden Mustafa Çavuş’dan iki yüz lira alındıkdan sonra on beş mavzer teslîm etmesinin kendisine tenbîh ve kezâ kömür tüccârından Hüsmen Ağa da tevkîf edilerek on beş mavzer teslîm etmek şartıyla tahliye edildiği ve bütün Trakya’da sa’at yedi buçuk[dan] sonra da dışarıya çıkmak ve evlerde lamba yakılması men’ ve bütün bu mu’âmelelerin Türk kesâfet-i nüfûsiyyesi bulunan mahallerde yapılmakda olduğu istihbâr kılınmağla ma’rûzdur. Ol bâbda emr ü irâde hazret-i men-lehü’l-emrindir.

Fî 28 Şubat sene [1]337 Sinekli’de Emniyyet-i hudûd Müfettişi

nâmına

Abdülhamid

Bâb-ı Âlî
Dâhiliye Nezâreti
Emniyyet-i Umûmiyye Müdîriyeti
Umûmî: 178
Emniyyet-i Umûmiyye Müdîriyeti Cânib-i Âlîsine

Atûfetlü efendim hazretleri,

Şehr-i hâl-i Rûmî’nin yirmi yedisinde sa’at iki buçukda Edirne’de İslâm ahâlinin cebren iştirâki sûretiyle ve Trakya’nın Türkiye’ye adem-i i’âdesi gâyesiyle büyük bir miting akdedildiği istihbâr kılınmağla ma’rûzdur. Ol bâbda emr ü irâde hazret-i men-lehü’l-emrindir.

Fî 28 Şubat sene [1]337 Sinekli’de Emniyyet-i Hudûd Müfettişi

nâmına

Abdülhamid

Hulâsa-i me’âl: Trakya’da Yunanîlerin tazyîkât ve tevkîfâtına dâ’ir.

Hâriciye Nezâret-i Celîlesine

Trakya’da tazyîkâtın bütün şiddetiyle devâm etmekde bulunduğu ve tütün ve silâh taharrîsi vesîlesiyle köyler basılmakda ve harekât-ı askeriyyeye iştirâk bahânesiyle ba’zı karyeler ahâlisi de tazyîk edilmekde olduğu ve Çakıllıköy karyesi erkeklerinin birer melce’ taharrîsi içün köylerini terkeylemekde bulundukları Sinekli Hudûd Emniyet Müfettişliği’nden evvelce bildirilmiş olduğu gibi, mezkûr müfettişlikden ahîren alınan 24 ve 26 ve 28 Şubat sene [1]337 târihli raporlarda da Yunanîlerin iki günden beri komiteci oldukları vesîlesiyle Edirne’nin müslim eşrâf ve mu’teberânını ve göze çarpan güçlü ve kuvvetli efrâdını tevkîf etmekde ve tevkîfhâneler, mevkûfîni istî’âb edemediğinden bir kısmının da Saraçhane Köprüsü başındaki istihkâm kışlasıyla yanık kışlaya sevkeylemekde oldukları ve Şarkî Trakya’daki tazyîkât ve tevkîfâtın tahammül-sûz bir şekil aldığı ve mevkûfîne dürlü dürlü işkenceler yapılarak kendileri bî-tâb bir hâlde bırakıldığı gibi son iki gün zarfında yalnız Çerkesköyü’nden yüz kadar kişinin bi’t-tevkîf Edirne’ye sevkedildiği ve Lülebergos, Kırkkilise, Vize, Saray ve Çerkesköy kasabaları eşrâf ve mu’teberânından tevkîf edilen zevâtın onar ve on beşer kişilik kâf[il]elerle bir semt-i meçhûle gönderildiği ve yetmiş yaşlarında bulunan Saray müftî-i sâbıkı ile eşrâfından altı kişinin dahi bunlar miyânında olduğu ve Çerkesköyü’nde Yunanîler tarafından darbedilenlerden on-on beş kişinin hânelerinde ölüm derecesinde hasta bir hâlde yatmakda oldukları ve Şubat’ın yirmi yedinci günü sa’at iki buçukda Edirne’de ahâli-i İslâmiyyenin cebren iştirâkiyle Trakya’nın Türkiye’ye adem-i i’âdesi hakkında büyük bir miting akdedildiği ve Yunanîlerin Şarkî Trakya’daki tazyîkât ve tevkîfâtı cümlesinden olarak Saray kazâsı müftî-i lâhıkı ile eşrâfdan Hasan Basri ve Kömür Tüccârı Sadık efendilerin tevkîf ve darbedildikleri ve Çerkesköy eşrâfından Mustafa Çavuş’dan iki yüz lira alındıkdan sonra on beş mavzer teslîm etmesinin kendisine tenbîh ve kezâ kömür tüccârından Hüsmen Ağa’nın tevkîf edilerek on beş mavzer teslîm edilmek şartıyla sebîl-i tahliye edildiği ve bütün Trakya’da sa’at yedi buçukdan sonra sokağa çıkmak ve evlerde lamba yakmak men’edilmiş olduğu misillü bütün bu tazyîkât ve tevkîfâtın Türklerin nüfûsca kesîf oldukları mahallerde icrâ edilmekde bulunduğu istihbârât-ı vâkı’aya atfen der-miyân kılınmış olduğu misillü evvelki gün Trakya’nın bütün kasabalarıyla ehemmiyetli kurâsında bulunan cemâ’at-i İslâmiyye hey’etlerine Yunanîler tarafından cebren mitingler yapdırılarak ve bi’l-umûm Trakya ahâli-i İslâmiyyesinin Yunan idâresinden hoşnûd olduklarını ve tekrâr hâkimiyyet-i Osmâniyye altına girmeği kabûl etmiyeceklerini ve bu uğurda Yunanîler ile birlikde müdâfa’ada bulunacaklarını mübeyyin izhâr edilmiş olan telgrafnâmeleri süngü altında kerhen imzâ etdirilerek Londra Konferansı’yla Atina’ya çekdirdikleri mevsûken haber alınmışdır. Ma’lûm-ı ilm-i nezâret-penâhîleri olduğu ve müsta’celiyyet-i maslahat cihetiyle makâm-ı sâmî-i vekâlet-penâhîye de başkaca arz u iş’âr kılındığı üzere Londra Konferansı’nın in’ikâd etdiği bir sırada Yunanîler tarafından ahâli-i İslâmiyye hakkında îkâ’ olunan şu zulm ü ta’addiyât İzmir ve Trakya nüfûsunun beyne’l-milel bir komisyon cânibinden tahkîki içün konferansca ahîren ittihâz olunan karâr ile alâkadâr olup tevfîkât ve tazyîkât-ı vâkı’a Yunanîlerin bir tarafdan oralardaki ahâli-i İslâmiyyeyi habs ve tazyîk ederek kendilerini hicrete mecbûr etmek ve diğer tarafdan mevkûfîni bir semt-i mechûle i’zâm yâhûd katl ve imhâ eylemek sûretiyle nüfûs-ı İslâmiyyeyi bi’t-taklîl Rumlar menfa’atine tefevvuku te’mîn gâyesine ma’tûf olacağı şübhesiz bulunduğuna ve esbâb-ı mezkûreden dolayı ahâli-i mahalliyyenin İstanbul’a muhâceret mecbûriyetinde kalması bir müddetden beri avâmil-i müte’addide dolayısıyla nüfûsu mütemâdiyen tezâyüd etmekde bulunan İstanbul şehrinin ihtiyâcâtını bir kat daha tazyîk ve teşdîd edeceğine binâ’en husûsât-ı mezkûre hakkında hissiyât-ı necîbe-i insâniyyetkârâneleri müsellem bulunan düvel-i i’tilâfiyye mümessillerinin nazar-ı dikkatleri celbolunarak ahâli-i İslâmiyyenin zulm ü tazyîkden vikâye esbâbının te’mîni ile berâber lede’l-îcâb konferans nezdinde dahi teşebbüsât-ı lâzimede bulunulmak üzere keyfiyetin Hey’et-i Murahhasa Riyâset-i Celîlesi’ne telgrafla teblîğini bi’l-hâssa ricâ ederim. Ol bâbda.

Fî 1 Mart sene [1]337

BOA. DH. KMS. 60-1/60