Türk Yunan

Yunan İşgal Kuvvetlerinin İzmit ve Yalova’da Katliâm ve Soygun Yaptıkları, Zararın Tazmin Edilmesi Gerektiği

Yunan kuvvetlerinin İzmit Körfezi’ndeki köy ve kasabaları işgal ederek yağmalayıp yaktıkları, kadın ve çocukları sıraya dizip tabur ateşiyle katlettikleri, bu katliâmın Yalovaya da yayılacağı anlaşılarak önlem alınması için İtilaf Devletleri nezdinde etkili teşebbüste bulunulması için müracaat yapıldıysa da sonuç alınamadığı ve Yunanlıların Yalova civarındaki on dört köyü yağmalayıp ateşe verdikleri, kaçamayanları camiye doldurup yaktıkları, Müslümanların bulunduğu yerlerde dikili bir ağaç dahi bırakmadıkları; özel bir tahkik komisyonu oluşturulup bu facianın tek tek tesbit edilmesi ve yöre halkının zararlarının tazmin edilmesi hususunda İtilaf Devletleri nezdinde teşebbüste bulunulması istirhamı.

21 Mayıs 1921

Dersa’âdet Merkez Kumandanlığı Cânib-i Âlîsine

Sa’âdetlü efendim hazretleri,

Yunan kıta’ât-ı askeriyyesinin İzmit Körfezi’ndeki kasabât ve kurânın işgâliyle bütün mebânî ve mü’essesâtı ihrâk ve sivil ahâlîyi bî-günâh olarak katl ve işgâl eylediği köyleri evvelen yağma ve bi’l-âhire ihrâk ile kadın, çoluk, çocuk ne buldu ise müdâfa’adan âciz bulunduklarından bunları bir sıraya tertîb ve müfrezesine ateş emri vermekde olduğunu ve şu zulüm ve denâ’eti Yalova kurâsına dahi teşmîl eyleyeceğini bir hey’et-i mahsûsa ile berâber gerek makâm-ı âlîlerinize ve gerek nezâret-i celîleye ihbâr ve bu bâbda serî’ bir tedâbir ittihâzıyla buna mümâna’at olunması ve inde’l-iktizâ beyne’l-milel kavâ’ide muhâlif ve beşeriyyet-i medeniyye ve ictimâ’iyye ile gayr-ı kâbil-i te’lîf bulunmasından nâşî Düvel-i İ’tilâfiyye me’mûrîn-i siyâsiyye ve askeriyyesi nezdinde teşebbüsât-ı şedîde ve serî’a ittihâz ve icrâsıyla hiç olmazsa muhtelit bir hey’etin Yalova’ya i’zâm etdirilmesi husûsunda vâki’ olan mürâca’at-ı âcizânemiz ma’a't-te’essüf salâhiyetdâr ve vazîfedâr olan makâmât tarafından bir netîce-i müsemmere iktitâf ve te’mîn olunamamasından nâşî arz ve ihbârât vechile Yunanlılar Yalova kasabası etrâfında mevcûd 14 aded İslâm köyünü evvelen yağma ve ahâlîsinin bir kısmı firâra muvaffak ve kısm-ı diğerini der-dest ile câmî’ derûnunda bunları ve köyleri bir anda gaz ile ihrâk ve İslâm mıntıkasında dikili bir ağaç, zî-ruh bir insan cesedi bırakmamışlardır ki mürâca’âtımızın sıhhat ve isâbeti şu sûretle ve ma’a't-te’essüf meydân-ı aleniyyete gelmişdir. Bundaki vazîfe ve mes’ûliyet şübhesiz alâkadâr ve vazîfedâr olan makâmât ve devâ’ire â’id olacağı vâreste-i bî-iştibâh ve inde’l-iktizâ zamânında vâki’ olacak tahkîkât-ı amîka ile vâsıl-ı mertebe-i subût olacağı bir emr-i bedîdâr ise de hakîkatin tecellîsi maksadıyla bu bâbda tahkîkât-ı amîka icrâ ve fecâyi’i yegân yegân tesbît etmek üzre ora ahâlîsinin vereceği ma’lûmâtı tevhîd zımnında bir komisyon teşkîliyle ahâlînin zararlarını da ta’yîn ve Düvel-i İ’tilâfiyye mümessilleri nezdinde delâlet ve teşebbüsât-ı mahsûsada bulunulması hakkında lâzım gelen makâmâta işbu istid’âmızın iblâğını ricâ eyleriz. Ol bâbda emr ü fermân hazret-i men-lehü’l-emrindir.

Fî 21 Mayıs sene [1]337 Yalova Ahâlîsinden

Dersa’âdet’de KüçükMustafa Paşa’da
Gülcâmi’ Mahallesinden
Said

BOA. HR. SYS. 2624/74

Yorum Bırakın